Nadakpan sa kapulisan ang usa ka lalaki nga giklasipikar isip No. 5 Regional Most Wanted Person sa Sitio Campaso, Barangay Tabla, Liloan, Cebu niadtong Septiyembre 5, 2026.
Nasikop siya sa Tracker Team sa Consolacion Municipal Police Station pinaagi sa intelligence-driven operation ug base sa Warrant of Arrest nga giisyu sa Regional Trial Court Branch 6 sa Mandaue City.
Atubangon sa wanted person ang upat ka counts sa rape, duha ka counts sa rape pinaagi sa sexual assault, ug grave threats nga may kalabotan sa RA 7610, o balaod nga nanalipod sa mga bata batok sa abuso ug pagpahimulos. Ang upat ka rape cases walay piyansa, samtang adunay girekomendar nga piyansa nga ₱200,000 alang sa duha ka sexual assault cases ug ₱36,000 alang sa grave threats.
Gidala ang suspetsado sa custodial facility sa Consolacion MPS samtang gikompleto ang mga dokumento alang sa iyang pag-atubang sa korte. Gipahayag sa Cebu Police Provincial Office nga ilang ipadayon ang pagpangita ug pagdakop sa mga wanted person, samtang gisiguro ang hustong proseso ug katungod sa mga akusado.
I via Renante Socia Lada