Lain na usab nga community outreach program, kun serbisyo caravan ang malampusong gipahigayon. Niining higayuna kini gipahigayon sa barangay Dangi lungsod sa Polanco niadtong Biernes December 10. Kini pinaagi sa pag dumala sa mga tinugyanan sa Rural Health Unit sa maong lungsod.
Ang naasoy’ng kalihukan gisugdan sa alas otso ang takna sa kabuntagon, pinaagi sa pag hatud sa nagka da-iyang pag alagad o serbisyo medical nga nag lakip na ang libreng check-up nga gidumala nila ni Dr. Patrisha Quema ug Dr. Francis Choy Bantilante. Diha usab si Analyn Olvis, officer in charge sa rural health unit, nga naghatud sa serbisyo medical sama sa libreng tuli kun circumcision, pag bakuna batok covid-19, fluoride sa mga ngipon ug nag hatag usab sila og libreng tambal.
Diha usab sa maong kalihukan ang mga tinugynan sa buhatan sa Municipal Social Development pinaagi ni Ms. Aileen Barba, Ms. Ermilinda ug Ms. Cheyrel Aguinaldo kinsa nagdala sa mga gatas ug milo nga maoy gi feeding sa mga kabataan. Nanghatag usab sila sa face mask alang sa tanan.
Mi alagad usab sa maong caravan ang tinugyanan sa Agriculture sa lungsod pinanguluhan ni MAO Edgar Agayan, Ronie Gonzales ug Ms Rosalinda Commodas nga nanghatag binhi sa mga utanon, sama sa talong, tangkong, pechay, ug kamatis. Nanghatag usab binhi sa mais ug ingonman organic fertilizers.
Gitanyag usab ang libre nga salo-salo sa paniudto ngadto sa katawhan nga mitambong. Ug sanglit ania pa kita sa pandemic tungod sa covid-19, ang tanan nag sunod gayud sa minimum health protocols labi na sa social distancing. Paghuman sa pag paniudto, gi served gilayon ang lami-an ug bugnaw kaayong ice cream panghimagas alang sa tanan.
Gi sunod usab dayon ang pag pang apod-apod sa relief goods nga may sulod tulo ka kilong bugas, duha ka beef loaf, duha ka sardinas ug ingonman tulo ka putos sa noodles. Diha usay tagsa ka pack nga mga goodess alang sa kabataan ug ingonman mga gatas nga pro mama alang sa mga masuso nga inahan.