Personal nibisita sa probinsya sa Sarangani ang bag-ong regional executive director sa Department of Agriculture sa Rehiyon Dose nga si Director Arlan Mangelen aron pangunayan ang pagpahigayon og program briefing kabahin sa programa karon sa Department of Agriculture entiro Pilipinas ilalum sa liderato ni Secretary William Dar gitawag nga “ALPAS Laban sa COVID-19” kon “Ahon Lahat, Pagkaing Sapat Laban sa COVID-19.”
Kung adunay “Build, Build, Build,” programa sa imprastraktura ni Pangulong Rodrigo Duterte, aduna usab karon “Plant, Plant, Plant,” usa ka rice resiliency program aron masiguro ang suplay sa pagkaon sa tibuok Pilipinas gumikan sa epekto sa Coronavirus pandemic.
Nahitabo ang program orientation ato lang nakalabay nga Hwebes, Mayo 7, sulod sa Sarangani Capitol Gymnasium kung diin anaa mismo sila Governor Steve Chiongbian Solon kauban sila Vice Governor Elmer De Peralta, mga board member ug ang mga mayores kuyog usab ang pito (7) ka municipal agriculturist ug si Mr. Jonathan Duhaylungsod, ang provincial agriculturist, sa pagsuporta nila Senador Manny ug Congressman Ruel Pacquiao.
Matud pa ni RD Mangelen, nagsugod na ang pagpananum sa mga mag-uuma dungan sa nasinatian nga mga pag-ulan rason nga karon nga semana lauman nga madawat na sa Sarangani Province ang libreng ihatag gikan sa DA Region 12 nga mga sinako nga dekalidad nga semilya sa humay alang sa matag munisipyo, pagasundan kini sa mga sinako nga dekalidad usab nga fertilizer. Karong semanaha pud lauman ang pag-abot sa mga linibo ka mga pato (duck) alang gihapon sa mga kwalipikadong mag-uuma, sundan sa gatusan ka mga kanding.
Sunod semana, muabot usab ang mga sinako nga OPV white corn. Pakapinan pa kini og mga binhi sa lagutmon, ug ang insurance aron maigo man sa kalamidad adunay mapaabot nga insurance claim.
Nakatutok pud ang BFAR alang sa programa sa mga mananagat. Segun ni DA Regional Director Mangelen, dugay na matud pa silang suod nga managhigala ni Governor Solon, ug naglaum kini sa malungtaron nga partnership sa DA ug sa LGU Sarangani.
May kalabutan sa Singko Mil ka pesos (₱5K) cash aid gikan sa Department of Agriculture alang sa kwalipikado nga mag-uuma, aduna nay unang batch sa mga farmer beneficiary ang lauman nga makadawat karong semanaha sa Sarangani Province. Ang tawag sa kini nga programa mao ang Rice Farmers Financial Assistance (RFFA), alang sa mga mag-uuma nga na-apektuhan sa balaod sa Rice Tariffication human niubos ang presyo sa palit sa palay gumikan sa imported rice sa merkado.
Sa pikas nga bahin, may kabahin sa insentibo alang sa mga coconut farmer atol sa krisis karon sa COVID-19, gikumpirma ni Jerry Prongco, ang OIC division chief sa Philippine Coconut Authority (PCA) Sarangani-Gensan, nga kasado na ang ilang programa gitawag nga “Coconut Intercropping Project.” Kadtong mag-inisyatibo mananum matud pa og mga saging, patatas o dili ba kaha cassava tunga-tunga sa ilang mga punuan sa lubi ang matagaan og Singko Mil ka pesos (₱5K) kung makita nga “stabilized” na ang pagdako sa gipangtanum sulod sa usa (1) ka ektarya ug sila ang dili pa SAP beneficiary sa DSWD.
Samtang, kadtong mananum og mga gulay lakip na luy-a ilalum sa mga punuan sa lubi ang matagaan pud og mga seeds ug fertilizer isip non-monetary incentive. Mangutana lang sa PCA technician nga musuroy sa mga kabarangayan sa Sarangani Province.
