Gisaysay ni Sarah, trayntay otso (38) anyos, usa ka COVID-19 survivor sa probinsya sa Sarangani ang iyang kasinatian pagkatapos kini naka-recover sa sakit nga pneumonia, ang kumplikasyon human nag-positibo sa Coronavirus.
Nakasinati si Sarah og ubo-bo adlaw nga Sabado, pagka-Dominggo nikatol na matud pa ang iyang tutunlan. Pagka-Lunes sa kadlawon gihilantan na kini niabot ang temperatura sa 38.3 degrees Celsius. Nawala ang hilanat pagka-Martes.
Iyang gi-report dayon ang iyang nabatyagan sa mga health official. Paspas nakapahigayon og antigen swab test. Samtang nagpaabot sa resulta sa RT-PCR aron makumpirma ug sa pagsugod pa lang sa iyang sintomas, hugot na niining gipatuman ang kwarantina. Wala na sya nagpaduol sa iyang pamilya ug mga silingan aron walay matakdan.
Sa pirmero, nagtuo kini nga makaya ra niini ang masinatian nga ubo tungod may balatian na kini nga asthma. Apan sa paghidangat sa ika-dose (12th) ka adlaw gikan sa paggawas sa iyang sintomas, gihutoy na kini sa pag-ubo, pneumonia na diay ang iyang nahulugan. Nisakit usab ang iyang dughan daw gisumbag ang iyang dughan.
Gibalikan kini sa hilanat sa ika-pito (7th) ka adlaw gikan sa paggawas sa sintomas, ug nawala ang pamugnaw human pa sa upat ka adlaw dungan sa pagpainum ug pag-injection kaniya og mga antibiotic.
Dili na makatakod ang Coronavirus human sa ika-onse (11th) ka adlaw gikan sa paggawas sa mga sintomas apan pwedeng mulungtad sa pipila ka adlaw ang mga kumplikasyon, sama sa pneumonia. Nawad-an usab kini og panglasa, dili malasahan ang mga gipang-kaon sugod sa ika-upat (4th) ka adlaw gikan sa paggawas sa mga sintomas.
Mapasalamaton na lamang si Sarah ngadto ni Governor Steve Chiongbian Solon tungod adunay Sarangani Provincial Hospital matud pa nga andam gaatiman kanila nga mga pasyente sa COVID-19. (OIC Cris Legaspi, RPN DXDX GenSan)
