Iriga City — Sinadol na ngunian ni Congresswoman JoSal Fortuno an Department of Public Works and Highways (DPWH) 5th Engineering District na rikasan an restoration works sa naraot na portion kan tinampo sa Brgy. Ombao Heights sa Bula, Camarines Sur matapos an magkapirang aldaw na pag-oran dara kan uminaging bagyong si Pepito.
Ini an inisyal na pahayag kan kongresista matapos na maaraman na dai pueding maagihan nin mga darakulang vehikulo an portion kan San Fernando By-pass Road huli sa pagrasay kan tinampo na solamenting mga motorsiklo na sana ngunian an nakakaagi.
Sinabi kan opisyal sa pakikipag-olay kan Radyo Ronda-Iriga, inapudan na niya si District Engineer Curimbao tanganing gibohan nin magkakanigong remedyo na dai masasakrispisyo an mga motorista na nag-gagamit kaini.
Inot kaini, kinompirmar ni Nono Pontanal, parapahayag kan banwaan nin Bula an pagsara kan tinampo sa mga darakulang vehikulo huli sa peligro na pagkahulog sa maabot sa 15 metros na hampas.
Mismo si Punong Barangay Lenny Parra kan Brgy. Ombao Heights an nangapudan sa mga nanunungdan na tabangan sinda sa nasabing problema.
(Source: Interview with Nono Pontanal)
