Nasikop sa kapulisan sa City of Naga, Cebu ang usa ka lalaki nga mubayad unta og shabu imbes kwarta human magpatubil sa gasolina sa usa ka gasoline station sa Barangay Langtad niadtong Miyerkules sa kadlawon, Oktubre 22, 2025.
Ang nadakpan mao si Barkley Labrador Capareda, 31 anyos, ulitawo, ug residente sa Barangay Bolinawan, Carcar City. Siya nadakpan alas 3:00 sa buntag human sa usa ka hot pursuit operation nga gilusad sa kapulisan sa Naga City Police Station.
Base sa imbestigasyon, gipa-full tank ni Capareda ang iyang Suzuki nga motorsiklo, apan dihang gipaninglan siya sa bayad, shabu hinoon ang iyang gikuot sa bulsa ug gisuway og ihatag sa pump boy nga si Jeric Generana, 26 anyos, taga Barangay North Poblacion, San Fernando.
Gipugos si Generana nga dawaton ang iligal nga drogas ug dihang nibalibad siya, mibunot og kutsilyo ang suspek ug gitiunan siya, dayon misibat sakay sa iyang motorsiklo.
Dali mitawag ang biktima sa kapulisan ug misakay sa patrol car aron motabang sa pagpanukiduki. Nadakpan nila ang suspek sa dalan, kinsa giingong wala pa kahuwasi sa paggamit og shabu.
Nahitabo ang ginukdanay dihang natumba ang motorsiklo sa suspek, apan dali ra siyang nadakpan ug giposasan sa mga pulis. Sa pagrekisa, nakit-an pa gyud sa iyang bulsa ang mga pinutos sa shabu.
Ang suspek karon preso na sa kustodiya sa Naga City Police Station ug pasakaan sa mga kaso nga paghupot ug ginadiling droga (RA 9165), illegal possession of deadly weapon, ug threats and intimidation tungod sa iyang gibuhat batok sa gasoline boy.
Matod sa kapulisan, kini nga insidente nagpamatuod nga padayon ang operasyon batok sa mga nalambigit sa drogas ug magpabilin silang mabinantayon aron mapanalipdan ang katawhan batok sa peligro nga dala sa iligal nga drogas.
I via Renante Socia Lada
