Aron mas mapaayo ug mamodernisa ang pamaagi sa pagkuha sa datos, ang Provincial Statistical Office sa Zamboanga del Norte nagpahigayon ug 2nd Level Training on the Use of Computer-Assisted Personal Interviewing (CAPI) Application sa unom (6) ka enumerators alang sa Retail Price Survey sa mga napiling produkto nga gamiton sa pagtino sa Consumer Price Index (CPI), nga gipahigayon sa A4M Building, Arellano Extension, Miputak, Dipolog City, kaniadtong Oktubre 22–23, 2025.
Unom (6) ka enumerators o price collectors ang gi-hire alang sa tinuig nga survey, ubos sa pagdumala ni Statistical Specialist II Angelica A. Guirgio isip focal person sa maong kalihokan. Ang training nagtumong sa pagpalig-on sa ilang kahibalo ug kasanayan sa paggamit sa CAPI system- usa ka digital nga pamaagi sa pangolekta sa datos aron mas mapaspas ug mas husto ang resulta.
Ang survey maglakip sa unom (6) ka outlets: duha (2) sa Dipolog City, ug tag-usa (1) sa Dapitan City, Manukan, Sindangan, ug Labason.
Ang Retail Price Survey ginahimo sa Philippine Statistics Authority (PSA) ubos sa Republic Act No. 10625 o Philippine Statistical Act of 2013, nga nagahatag gahum sa ahensya sa pagdumala sa mga nasyonal nga survey ug estadistikal nga kalihokan.
Gihangyo sa PSA ang kooperasyon sa mga residente ug mga establisyemento nga maapil sa survey aron makab-ot ang tukma ug kasaligan nga datos nga magsilbing giya sa paghimo sa mga polisiya ug programa para sa kalamboan sa sektor sa ekonomiya.(Iken B. Gullem)
Photo courtesy: PSA Zamboanga del Norte