Gipangandaman na sa Kapitolyo sa Sugbo ang usa ka dako nga pondo nga ₱913 milyon alang sa Kumbati Cebu, ang programa sa Provincial Government nga nagtumong sa pagbangon ug rehabilitasyon sa mga lugar sa amihanang bahin sa Cebu nga naapektuhan sa linog nga may kusog nga magnitude 6.9 niadtong Septiyembre 30, 2025.
Sa maong kantidad, ₱542 milyon gikan sa wala magamit nga trust fund sa kalamidad gikan pa sa tuig 2020 hangtod 2025, samtang ₱371 milyon gi-apod-apod alang sa Provincial Disaster Risk Reduction and Management Fund (PDRRMF) karong tuiga. Ang pondo nga ₱542 milyon gipanag-iya sa Kapitolyo human kini maaprubahan sa PDRRMC meeting niadtong Oktubre 22, 2025.
Sumala ni Assistant Provincial Administrator Aldwin Empaces, gipasabot ni Gov. Pamela Baricuatro nga unahon ang pag-ayo sa mga kalsada ug tulay, tungod kay kini ang gikinahanglan aron mapasayon ang kalihukan sa negosyo ug pabiyahi sa mga tawo, labi na sa mga lugar sa Tabogon ug Borbon nga grabe naapektuhan.
Sa plano sa Kumbati Cebu Investment, ₱238 milyon ang ipatuman alang sa rehabilitasyon ug pag-ayo sa mga kalsada ug tulay. Nagkoordinar usab ang Kapitolyo sa Department of Public Works and Highways (DPWH) aron mahibal-an kung asa gyud ang mga istruktura nga dapat unahon og ayo o tukuron pag-usab.
Gipahibalo usab ni Empaces nga ₱20 milyon ang gi-allocate alang sa pagbangon sa sektor sa agrikultura, samtang ₱15 milyon ang giandam para sa livestock, poultry production, ug farm housing rehabilitation. Gawas niini, nakadawat ang Kapitolyo og ₱134 milyon nga cash donations, diin ₱50 milyon niini gikan sa Office of the President.
Sa maong donasyon, ₱111 milyon na ang nagamit para sa relief operations, samtang ₱23 milyon pa ang magamit sa padayon nga mga proyekto sa rehabilitasyon. Ang Kapitolyo nagplano usab sa ubang mga proyekto aron mapalig-on ang disaster preparedness ug emergency response sa tibuok probinsya.
Lakip sa mga proyekto ang pagpalit sa food ug hygiene kits (₱49M), mobile kitchens (₱51M), rescue gears ug drones (₱14M), sea ambulance (₱50M), mobile clinics ug emergency vehicles (₱64.2M), ug firefighting equipment (₱4.3M). Ang Provincial Rehabilitation and Recovery Council (PRRC), nga gipangulohan ni Gov. Baricuatro, mao ang nagdumala sa Kumbati Cebu framework ug nagtinabangay sa mga ahensya sama sa DPWH, DSWD, DOH, DTI, OCD, ug mga representante sa pribadong sektor aron masiguro ang tin-aw ug epektibong pagbangon sa probinsya.
Source: Cebu Province PIO
I via Renante Socia Lada