Cebu City – Givalidate ug usab sa Department of Education Central Visayas (DedEd 7) ang 440 ka mga tunghaan nga mi propose pagsalmot sa expansion sa limited face-to-face classes sa rehiyon.
Gibutyag ni DepEd 7 Director Salustiano Jimenez nga mamahimong dunay kausaban sa desisyon sa concerned stakeholders sa 430 ka mga pampubliko ug 10 ka pribadong tunghaan nga gi endorse sa regional office ngadto sa central office.
Matod ni Jimenez nga ang revalidation gumikan kini sa bag-ong kadaot nga gibilin sa bagyong Odette sa rehiyon nga miabot ug ₱ 6.6 milyones nga danyos sa mga classrooms as of Enero 15, 2022.
Nagkanayon ang education official nga iya nang gitugyan ngadto sa division offices ang revalidation tungod kay posisbling dunay mga kausaban sa tunghaan, labi na kadtong na grabehan pag-igo sa maong bagyo.
Dugang ni Jimenez nga ila sab nga gi suta kung ang concerned local government units, parents and teachers pabilin pa sa ilang desisyon nga ipadayon ang maong implementasyon.
Gawas sa kadaut nga gibilin sa bagyong Odette, sigon pa ni Jimenez nga ila sab nga gikonsidera ang pagsaka sa Covid-19 cases ug hulga sa Omicron variant.
Samtang ang tibook Central Visayas, gawas sa Siquijor, gibutang sa Alert Level 3, gipahibaw ni Jimenez nga dunay mga eskwelahan nga padayon nga nangandam kun ugaling mamahimong maka implementa sa expansion sa higayon nga ma downgrade na ang restriction.
Sigon pa sa regional director nga sa Alert Level 2 ug sa mas ubos pa, ang DOH motugot sa pagpahigayon ug limited face-to-face classes basta lang nga mosunod sila sa basic requirements.
Basi sa implementasyon sa location-situation based approach, alang ni Jimenez nga ang desisyon pinasubay sa pag-uyon sa LGUs ug mga ginikanan.
“If they would beg off from joining because of the damage incured by schools and classrooms, and the parents would have a hard time sending their children to school because their homes have no electricity and water supply, we will respect that,”pasabot ni Jimenez.
Alang ni Jimenez nga dili nila pugson ang ilang learners pag tungha sa klase kung dili motugot ang ilang ginikanan o guardians.
Nag expect hinoon si Jimenez nga ma aprobahan sa central office in coordination sa DOH ang tanang tunghaan nga mi propose.
(Source: Department of Education 7, photo courtesy by Roel Etcobanez Versales)