Ang pagdugay ug paglungtad sa COVID-19 maingon nga usa ka butang nga wala gidahom nga mahitabo sa tibuok kalibutan nga nagdala og dakong epekto dili lamang sa panglawas sa katilingban apan lakip na ang pagkahugno sa ekonomiya.
Isip pagpangandam sa posibleng pag-abot sa mga nagkadaiyang sakit o pagbalik sa maong virus nga miigo sa tibouk kalibutan, ang Panggamhanang Lokal sa Misamis Oriental pinaagi sa Provincial Risk Reduction Management Office (PDRRMO) nagpahigayon og usa ka Training Write Shop on Developing Contingency Plan for Emerging and Re-emerging Infectious Diseases.
Kini gipahigayon niadtong Nobiyembre 16-19, 2021 sa Hotel de Susana, Valencia City, Bukidnon kung asa nahimong posible ubos sa Moving Urban Poor Communities Toward Resilience (MOVE UP) Program ug Assistance and Cooperation for Community Resilience and Development (ACCORD) nga usa ka Non-Governmental Organization nga gipondohan sa European Union Humanitarian Aid.
Ang Probinsya sa Misamis Oriental isip usa sa benepisyaryo sa MOVE UP Project nagpadala ug mga representante gikan sa PDRRMO, Provincial Social Welfare and Development Office ug Provincial Planning and Development Office aron aktibong mosalmot sa maong aktibidades.
Sa 98 ka mga LGUs sa Northern Mindanao Region, ang Misamis Oriental bulahan kaayo human nahimong usa sa unang upat ka Local Government Units nga napili nga moapil sa paghimo og contingency plan sa emerging and re-emerging infectious disease.
Ang contingency plan nagsilbi nga operating procedure guide o manwal sa LGU alang sa usa ka partikular nga peligro nga mahimong makaapekto sa tagsa-tagsa ka dapit nga ginsakupan niini.
Kanunay nga gibarugan sa Panggamhanang Probinsya sa Misamis Oriental ubos sa pagdumala ni Gobernador Bambi Emano nga mahatagan ang katawhan sa lalawigan og luwas ug adunay seguridad nga kinabuhi sa bisan unsang matang sa kalamidad o insidente dili lamang alang karon apan sa umalabot.
(Source: Misamis Oriental Provincial Information Office Facebook page)