Dako og pag-ubos sa kaso sa COVID-19 ang natala sa Cagayan de Oro sulod na sa pila ka adlaw nga miresulta sa dako’ng pagkunhod sa Average Daily Attack Rate (ADAR), 2 week growth rate (2WGR) ug hospital care utilization rate (HCUR) basi sa datos sa City Health Office (CHO).
Sa kasamtangan, anaa na lamang sa -84% ang 2WGR, 3.03 ang ADAR ug 16.33% ang HCUR, kon itandi sa pinakataas nga 214% nga 2WGR, samtang 37.88% ang ADAR niadtong Pebrero 1 ning tuig, diin anaa usab sa 258 ang daily cases.
Mitala na lamang usab sa 5 ug 6 daily cases ang Cagayan de Oro sa milabay’ng duha ka adlaw (Sabado ug Domingo) nga miresulta sa pag-ubos sa total active cases nga anaa na lamang sa 670.
Miubos usab ang gidaghanon sa mga pasyente nga anaa sa hospital tungod sa COVID-19, diin kadaghanan sa mga nataptan nakasinati lamang sa mild cases.
Apan bisan pa man sa mas luag na nga restriction, nagpahinumdom si Mayor Oscar Moreno sa katawhan sa pagsunod kanunay sa minimum public health standards aron magpabiling ubos ang kaso sa COVID 19 dinhi sa syudad. (ACM | CIO)
(Source: Cagayan de Oro City Philippines Facebook page)