Milihok ang City Government of Dapitan aron mapanalipdan ug mapalig-on ang baybayon sa Barangay Polo pinaagi sa pagtanom og 60 ka katutubong punongkahoy didto sa Purok Pasil niadtong Hulyo 23.
Gipangunahan ni City Councilor Dennis Tan, kauban si Barangay Chairman Oscar Balladares, mga miyembro sa Barangay Council ug personnel sa City Environment and Natural Resources Office (City ENRO), ang coastal tree-planting activity isip konkretong lakang sa pagpreserbar sa coastal ecosystem.
Lakip sa gitanom ang Balokbalok, Bitaug ug Talisay, nga gipili tungod sa ilang pagkaangay sa daplin sa baybayon ug sa ilang potensyal nga makatabang sa pagpugong sa coastal erosion, pagpasig-uli sa coastal habitats ug pagpalig-on sa natural nga depensa sa komunidad batok sa storm surge ug epekto sa climate change.
Kabahin ang maong kalihokan sa padayong environmental conservation efforts sa siyudad nga nagtumong sa pagpanalipod sa natural resources ug pagpalambo sa mga lugar nga makatabang sa pagpalig-on sa kalikupan.
Pinaagi sa maong inisyatiba, gipakita sa City Government of Dapitan ang padayong aksyon niini sa pag-atiman sa baybayon ug pagpalig-on sa environmental protection efforts pinaagi sa aktibong pag-apil sa mga lokal nga lider ug komunidad.(IKEN B. GULLEM)
Source: Dapitan City Government