Bag-o lang gitapos sa Provincial Early Childhood Care and Development Office ubos sa pagdumala ni Ms. Maryden Ocot ang ilang ika-11 ug katapusang yugto sa Kwentuhang Bulilit.
Ang kalihokan gisalmotan ni Dr. Teresita G. Inciong, ang Executive ug Vice-Chairperson sa Early Childhood Care and Development Council ug si Ms. Paula Peralejo-Fernandez nga usa ka kanhi aktres ug karon full-time nga inahan.
Ang panaghisgot sa miaging yugto nagpunting sa usa ka pakigpulong sa pagkaginikanan kon Parenting Talk ug ang mga pagpangandam ni Ms. Paula nga mahimong usa ka full-time nga inahan sa iyang mga anak.
Gipaabot sab sa buhatan ang ilang dakong pasalamat ngadto sa tanang mitan-aw ug miduyog kanila sa pagsaksi sa serye sa Kwentuhang Bulilit nga episode.
Gikan niadtong Septiyembre 16, 2021 gisugdan ang maong programa kung asa dako og benepisyo alang sa mga kabataan ug sa mga ginikanan nga sila mahatagan og dugang kaalam nga ilang nabatonan gikan sa nagkalain-laing bisita nga dako og kontribusyon sa pagbag-o sa ilang kinabuhi.
Prayoridad sa Panggamhanang Lokal sa Misamis Oriental sa pagpanguna ni Gobernador Bambi hilabina na ang Provincial ECCD Office nga mohatag og dekalidad nga sayong pagtuon sa tanang mga kabataan sa probinsya.
Kini nahisubay sa misyon sa maong buhatan uban sa pagtuo nga ang pag-atiman sa mga kabataan maoy pag-amoma sa kaugmaon sa katilingban. Nasayud si Gobernador Bambi nga ang sayong edukasyon dakong parte alang sa kaugmaon sa nasud hinungdan nga walay puas ang suporta niini alang sa mga kalihokan ug mga lakang sa ECCD Office alang sa mga kabataan nga nagpakita sa iyang dakong gugma alang sa lamdag ug hayag nga kaugmaon sa probinsya.
(Source: ECCD-MisOr)