Isip molupyo sa Gingoog City, dili makadawat si Kaabag Kami vice gubernatorial candidate Ariel ‘Ayi’ Hernandez nga magpadayon ang pagpangilad sa mga gamhanang politiko kansang katuyoan ug interes mao lang ang pagpabukad sa ilang salapi samtang anaa pa sa poder sa Gingoog City.
‘Kung matintal ta sa pagbaligya sa atong gahum og dignidad karong May 9, walay paingnan ang atong pinalanggang siyudad sa Gingoog…usa sa bug-at nga implikasyon mao nga wala tay PhilHealth card og wala tay maayo nga district hospital… wa nay dignidad ang atong pamilya kay makipagkaluoy aron mohangyo’g tabang sa politiko sa paggastos palit og tambal ug pang-ospital,’ panawagan ni Hernandez sa katawhan nga mitambong sa rally sa Gingoog City bag-ohay lamang.
Sumala ni Hernandez ang piliay sunod bulan usa ka lumba tali sa sapian nga kandidato nga gustong mamawi sa iyang gasto sa kampanya ug kandidato nga sinsero ug seryoso nga moalagad sa publiko.
(Source: CIO | Kaabag KAMI Facebook page)