Impasingked ni Ms. Divine Sevilla, mangidadaulo iti Speak up I’m Here Mental Health Hotline and Center ti gobierno probinsial a nakasagana ti opisina da a tumulong kadagiti umasideg a kliente da ken agtawtawag iti hotline.
Kunana a naruay dagiti kailian ti mapmapan iti center a mangidandanon iti problema da ken makasarasarita da met dagitoy a nasayaat.
Inlawlawagna a nagduduma a parikot ti maidandanon kadakuada ngem kadduan ket anxiety/depression, relationship break-ups, pannakapukaw ipatpateg iti biag, kaawan ti trabaho ken problema ti kuarta.
Inpalgakna nga idi tawen 2020,umabot dagiti 144 dagiti natulunganda, idi 2021, 429 ken iti daytoy a tawen 2022 itay laeng napan a bulan ti Enero ket 27 dagiti nagbalin a kliente da a kaadduan ket babbai.
Kunana a 24/7 iti panagserbi da tapno matulungan dagiti kailian a makasapul iti saranay ken adda met dagiti mabalin a pangiyondarsaran nga opisina depende no ania a problema gapu ta daytoy iti gagem ni Gob. Matthew Marcos Manotoc ti makatulong kadagiti addaan iti problema nga awan ti sabali a kamangan da.
(Source: Provincial Government of Ilocos Norte)
