Agsagsaganan ti Provincial Government of Ilocos Norte babaen ti Provincial Resiliency Office para iti igagatang ti probinsia iti rescue boats.
Inlawlawag ni Mr. Marcell Tabije, Provincial Local Disaster Risk Reduction Management Officer, a ti panangipasa ti Sangguniang Panlalawigan ti maysa a resolusyon ti maysa kadagiti requirement para iti panangparuk-at ti Department of Interior and Local Government (DILG) iti insentibo nga ipaayda ti probinsia mainaig iti pannakaipasa ti probinsia iti Seal of Good Local Governance (SGLG) itay napalabas a tawen 2023.
Impalgakna nga uppat a milyon a pisos ti insentibo a naituding nga ipaay ti DILG iti Ilocos Norte a gunguna ti probinsia iti pannakaipasana iti SGLG.
Mainaig iti daytoy, impalgakna a plano ti probinsia ti gumatang iti dakdakkel a rescue boats.
Mangnamnama ni Mr. Tabije nga umanay ti pundo para iti nasao a ganuat ken no adda ti sobra na ket gumatang pay ti probinsia kadagiti nayon a kagamitan para iti resiliency office.
Inbunannagna a dua (2) ti immuna a plano a magatang a rescue boats ngem gapu iti ingingina ti presyo dagiti magatgatang ket makita a naimbag no ania ti mabalin a pakausaran ti nasao a pundo.
Impalgakna a ti kalikagum ti probinsia a magatang ket walo (8) agingga ti sangapulo (10) ti kapasidadna a rescue boat tapno daytoy ti mausar kadagiti naapres a karayan wenno iti baybay kangrunaanna iti pannakaisayangkat ti search and rescue operations wenno para iti pannakaidanon ti relief efforts kadagiti narigat a madanon a lugar nangnangruna no panawen iti kalamidad.
Imbatadna a addaan ti probinsia iti rescue boats nga innem laeng iti kapasidadna a mabalin usaren kadagiti malayus a barangay kas iti maysa a fiber glass pakairamanan ti indonar ti Department of Science and Technology a maysa met laeng a fiber glass ken maysa a rubber boat.
Innayonna a dagiti rubber boats ti probinsia ket naipasidong iti 505 Search and Rescue Squadron iti Laoag International Airport tapno dagitoy ti mangisigurado a napintas ti “maintenance” dagiti nasao a kagamitan.
Kabayatanna, inpakaammo ni Mr. Tabije a no addanto pay ti mabati a pundo ket kalikagum ti probinsia ti gumatang iti dakdakkel a drone. (Irene Ringor via PGIN CMO)
