Naiget ti panangsupurta ni Gob. Matthew Marcos Manotoc iti nagbalin nga addang ti gobierno nasional a pannakaipalubos ti face-to-face classes kadagiti maibilang a low-risk areas wenno saan unay a napeggad a lugar iti covid 19.
Mainaig pay laeng daytoy iti naituding a panangrugin ti limited face-to-face classes inton Nobiembre 15 iti daytoy a tawen kadagiti siyam a public elementary ken secondary schools nga immunan nga inaprobaran the Dept. of Education ditoy Ilocos Norte.
Segun iti gobernador, daytoy ket tapno makapag sakdon a nasayaat ti adal ken sursuro dagiti ubbing nga agad adal iti elementarya ken sekondarya.
Maibilang kadagiti pagadalan a maipalubos iti limutado pay laeng a “face to face classes” ket ti Alao-ao Elementary School ken Paddagan Elementary School iti ili a Bangui; Bicbica Primary School, Buanga Elementary School, ken Godogod Elementary School iti ili a Pinili, Cacafean Elementary School iti ili a Marcos ken Dumalneg Elementary School, Dumalneg National High School ken San Isidro Elementary School iti ili a Dumalneg.
Nupay kasta, impasingked ti gobernador a kasapulan a masigurado nga agtulnog dagiti agad adal ken dagiti mangisursuro kadagiti minimum health standards tapno awan iti pangrugian ti mabalin a panagwaras manen iti covid 19.
(Source: Provincial Government of Ilocos Norte)