Gipalig-on sa Social Registry Section (SRS) sa Department of Social Welfare and Development Field Office IX (DSWD FO IX) ang pagberipika sa mga benepisyaryo atol sa ikaduhang tranche payout sa Unified Package for Livelihoods, Industry, Food, and Transport (UPLIFT) Program sa Dapitan City.
Gigamit sa SRS ang “Basta Beripikado, Mabilis ang Serbisyo” o BBM Serbisyo, usa ka online platform nga nagtugot sa pag-authenticate ug pag-validate sa identidad ug rekord sa mga benepisyaryo nga rehistrado sa Philippine Identification System (PhilSys).
Isip kabahin sa proseso, kuhaon ang PhilSys Card Number (PCN) sa mga benepisyaryo aron mapamatud-an ang ilang rekord ug masiguro ang tukmang pag-update sa ilang impormasyon.
Pinaagi sa verification process, ma-validate ug ma-record ang profile sa mga benepisyaryo sa DSWD Social Registry. Gilauman nga makatabang kini sa pagpalambo sa tukma ug kasaligan nga database, lakip ang dugang nga proteksyon batok sa posibleng fraudulent transactions.
Gipasiugda sa DSWD ang kamahinungdanon sa maong proseso aron maseguro nga ang mga programa, ayuda, ug serbisyo sa gobyerno maabot sa mga kwalipikado ug hustong benepisyaryo.
Ang UPLIFT Program usa sa mga social protection initiative sa gobyerno, kauban sa Assistance to Individuals in Crisis Situation (AICS), nga naghatag og pinansyal ug materyal nga tabang sa mga indibidwal ug pamilya nga anaa sa krisis o adunay panginahanglan sa suporta.(IKEN B. GULLEM)
Source: Zanorte News Flash