Giablihan ni Mayor Evelyn “Belen” T. Uy ang Shrine City Pickleball Center sa DAMPA, Barangay Banonong, Dapitan City, isip dugang nga pasilidad alang sa sports, recreation, ug pagpalambo sa mas aktibong estilo sa kinabuhi sa mga Dapitanon.
Gipangunahan ni Mayor Uy ang opening ug ribbon-cutting ceremony sa bag-ong pasilidad, uban sila City Administrator Danilo S. Areños Jr., CPA, 2nd District Board Member Venus A. Uy, ug 3rd District Board Member Leo Nicanor B. Mejorada sa Zamboanga del Norte. Gipanalanginan usab ni Rev. Fr. Gio Laxina ang pasilidad.
Mitambong usab sa opening ang mga partisipante sa Executive Cup sa 17th Inter-Government Agency Sportsfest (IGAS), nga nakadugang sa sportsmanship ug camaraderie nga maoy nag-ulohan sa kalihokan. Mitambong usab si City Economic Enterprise Head Susan Empeynado, nga nanguna sa pagpangandam alang sa maong kalihokan.
Gitukod ang bag-ong pickleball center isip tubag sa nagkadugang nga interes sa mga Dapitanon sa pickleball ug uban pang pisikal nga kalihokan. Naghatag kini og accessible nga lugar diin ang mga pamilya, higala, sports groups, mga bag-ohan, ug mga sports enthusiast mahimong magdula, magpakig-uban, ug magpabiling aktibo.
Ang Shrine City Pickleball Center abli usab alang sa publiko nga gustong mo-renta sa pasilidad, aron mas daghan pa ang makatagamtam sa maong sport ug makahimo sa regular nga pisikal nga kalihokan isip kabahin sa mas himsog nga estilo sa kinabuhi.
Pinaagi sa maong pasilidad, nagpadayon ang City Government sa paghatag og mga lugar nga makasuporta sa sports ug recreation, samtang nagdasig sa mga Dapitanon nga mahimong mas aktibo, magpakig-uban, ug magpabiling himsog.(IKEN B. GULLEM)
Source: Dapitan City Government