Gi-orient sa Department of Labor and Employment (DOLE), uban sa National Irrigation Administration–Zamboanga del Norte Regional Sub-Office (NIA-ZDNRSO), ang 20 ka farmer-beneficiaries sa Tulong Panghanapbuhay sa Ating Disadvantaged/Displaced Workers (TUPAD) niadtong milabay nga adlaw, sa Olingan, Dipolog City, Zamboanga del Norte.
Kabahin sa 45-adlaw nga TUPAD engagement ang paghinlo, pag-desilt, ug pagtangtang sa mga sagabal sa irrigation canals ug mga kalambigit nga pasilidad sulod sa service area sa Dipolog National Irrigation System (NIS).
Gipatin-aw atol sa orientation ang mga buluhaton ug responsibilidad sa mga benepisyaryo, lakip ang safety protocols, hustong pamatasan sa trabaho, ug mga sumbanan sa pagpatuman sa programa.
Gipunting sa maong kalihokan ang pagpaayo sa kahimtang ug pag-agos sa tubig sa mga irrigation canal isip pagpangandam alang sa 2026–2027 dry cropping season. Pinaagi niini, gilauman nga masiguro nga hapsay ug andam ang mga pasilidad sa irigasyon sa pagserbisyo sa mga mag-uuma.
Gipasiugda usab ang importansya sa regular ug hustong pagmentinar sa mga canal aron mapadayon ang episyenteng paghatod sa tubig ngadto sa mga agricultural areas.
Kabahin ang maong inisyatiba sa convergence partnership tali sa DOLE ug NIA, diin nagtinabangay ang duha ka ahensya sa paghatag og temporaryong trabaho samtang gisuportahan ang pagmentinar sa mga pasilidad nga importante sa produksyon sa agrikultura.(IKEN B. GULLEM)
Source: NIA Zamboanga Peninsula