Malampusong gitapos sa Dapitan City ang lima ka adlaw nga 17th Inter-Government Agency Sports Fest (IGAS) niadtong Septiyembre 18 pinaagi sa grand culmination ceremony nga gipahigayon sa Dapitan City Government Center Grounds.
Gitigom sa maong kalihokan ang mga kawani gikan sa nagkalain-laing national government agencies, provincial, city, ug municipal offices sa Zamboanga del Norte alang sa kompetisyon sa nagkalain-laing sports events, samtang gipalig-on ang sportsmanship, teamwork, panaghigalaay, ug panaghiusa tali sa mga public servants.
Kabahin ang kalihokan sa selebrasyon sa 126th Philippine Civil Service Anniversary karong Septiyembre 2026, nga adunay tema nga “Bawat Kawani, Lingkod Bayani: Puso, Dangal, at Galing Para sa Bayan.”
Sulod sa lima ka adlaw nga kompetisyon, gipakita sa mga partisipante ang ilang mga abilidad sa sports, disiplina, determinasyon, ug teamwork pinaagi sa nagkalain-laing sporting events ug kalihokan.
Gipasiugdan sa closing ceremony ang paghatag sa mga premyo, awards, ug certificates ngadto sa mga mananaog ug partisipante nga nakapakita og maayong performance sa ilang tagsa-tagsa ka kompetisyon.
Mitambong sa seremonya si Atty. Jerry N. Mayormita, Acting Director III sa Civil Service Commission Regional Office IX (CSC RO IX), ug Mr. Robert I. Poculan III, Presidente sa Zamboanga del Norte Federation of Government Employees’ Union, Inc. (ZNFGEU, Inc.). Kauban usab nila si Dapitan City Vice Mayor Gabriel M. Cad, mga miyembro sa Sangguniang Panlungsod, ug mga opisyal sa provincial, city, ug municipal governments.
Gikongratulate ni City Mayor Evelyn “Belen” T. Uy ang tanang mananaog ug partisipante, ug iyang giila ang ilang paningkamot, sportsmanship, ug aktibong pag-apil sa lima ka adlaw nga kalihokan.
Dili lamang mga medalya ug ranggo ang nahatag sa maong sports fest, kondili usa usab kini ka higayon alang sa mga kawani sa gobyerno nga makapahuway gikan sa ilang naandan nga trabaho, makig-uban sa ubang public servants, ug mapalig-on ang panaghigalaay ug panaghiusa tali sa nagkalain-laing government offices.
Usa sa mga highlight sa closing program mao ang pormal nga pag-turnover sa hosting responsibility alang sa IGAS 2027 ngadto sa Municipality of Liloy. Girepresentahan ni Municipal Human Resource Management Officer Sheila Marie S. Naong si Liloy Mayor Roberto L. Uy Jr. sa maong seremonya.
Pinaagi sa turnover, ang Municipality of Liloy maoy mo-host sa sunod nga IGAS, nga magpadayon sa tradisyon sa paghiusa sa mga kawani sa gobyerno pinaagi sa sports, fellowship, ug healthy competition.
Bisan pa sa pagtapos sa lima ka adlaw nga kompetisyon, magpadayon ang mga panaghigalaay, maayong mga panumduman, ug espiritu sa “Bawat Kawani, Lingkod Bayani” nga naporma taliwala sa mga partisipante.(IKEN B. GULLEM)
Source: Dapitan City Government