Naurnos ken naannayas ti pannakaisayangkat ditoy Ilocos Norte ti nagtallo nga aldaw a “National Vaccination Days”.
Segun ken ni Gob. Matthew Marcos Manotoc, impadanon a mismo ni National Task Force Against COVID-19 Chief Implementer and Vaccine Czar Secretary Carlito G. Galvez ti panangkablaawna iti Ilocos Norte iti napintas a nagresultaan ti nasao a panagbakuna.
Kunana a daytoy ti mangipakita a napnek ti sekretario iti nagresultaan ti naisayangkat a panagbakuna ditoy probinsia. Inlawlawag ti gobernador nga umab-abot iti innem a pulo rbu a kakailian ti nabakunaan manipud Nobiembre beinte nuebe agingga iti Disiembre uno.
Mainaig iti daytoy, imbatadna a nakadakdakkel a banag ti pannakaisayangkat ti nasao a panagbakuna iti intero a pagilian. Mamati ni Gob. Manotoc a dakkel ti maitulong daytoy iti al-alisto a pananggun-ud ti pagilian iti “herd immunity”.
(Source: Provincial Government of Ilocos Norte)