Nakipaset ni Gob. Matthew Marcos Manotoc iti maysa kadagiti aktibidad iti maika-44 a foundation anniversary ti Mariano Marcos State University.
Daytoy ket nupay saan a nakadar-ay ti gobernador iti Teatro Ilocandia a nakaisayangkatan ti convocation para iti State of the University Address ni Dr. Shirley Agrupis a presidente ti unibersidad.
Kinablaawan ti gobernador ti sibubukel nga unibersidad kangrunaanna ken ni Agrupis iti adu a balligi a nagun-udanen ti MMSU babaen iti “Stream Live Video on Line”.
Impadanonna ti napalaus a panagyamanna iti serbisio nga ipapaay ti unibersidad kadagiti kakailian.
Inulitna nga inbunannagna a babaen iti unibersidad ket nagun-ud ti sirmata daydi Pres. Ferdinand Edralin Marcos a lolona a mabalin dagiti kakailian ti agsakdo iti de kalidad nga adal a saanen a kasapulan nga umadayo pay iti probinsia.
Kabayatanna, kinumendaran pay ti gobernador ti MMSU kadagiti naruay a nagapoananna a para iti pagsayaatan ti probinsia kadagiti kallabes a tawen.
Ginutigutna ti unibersidad a mangipaay iti naan-anay nga adal ken panagsanay kadagiti Ilocano ket maipamatmatda ti kadakkel a tulong a maipaayda para iti panagdur-as ti probinsia.
Impatalgedna ti agtultuloy a suportana ken ti sibibukel a gobierno probinsial iti MMSU.
Innayonna a dakkel a pakaidayawanna ti panagbalinna metten a kas maysa nga “stallion”.
(Source: MMSU)