SURIGAO CITY- Gialmahan sa mga aplikante ang bag-ong sistema sa pagkuha ug Police Clearance nga karon online na ang pagproseso.
Sumala sa nahinabing mga aplikante sa Radyo Ronda nga wala na magpainterview, nga imbis mapadali ang transaksyon sa pagkuha ug police clearance, ang nakapasamot naman hinuon sa kadugay gumikan sa gipaimplementar nga mga procedures. Gawas sa kadugay, mudako pa gyud ang galastuhon sa pagkuha karon ug police clearance.
Sa gihimong pakisusi sa Radyo Ronda ngadto sa Surigao City Police Station, nasayran nga gipatuman na nila ang National Police Clearance System.
Sumala pa aron makakuha ug police clearance, kinahanglan pa’ng magparehistro sa https://pnpclearance.ph aron makapaschedule ug appointment sa police station nga gustong kuhaan ug police clearance, ug aron makakuha ug Reference # pagbayad sa 150 ka pesos ngadto sa nagbinugtong nga bangko nga nakaindikar sa transaction details.
Apan ang nakapait kung ang aplikante wala’y bank account sa mao nga bangko, kinahanglan pa’ng mag-open account sa kantidad 500 ka pesos aron maproseso ang payment adisir muadto sa selected police station alang sa issuance sa police clearance uban sa pipila ka mga rekisitos.
Gumikan sa maong sistema, aduna’y pipila ka mga establisyemento ang nagtanyag ug serbisyo sa pagproseso ug online application alang sa pagkuha ug police clearance nga aduna’y service charge 50 ka pesos. Ug laing serbisyo alang sa wala’y bank account sa kantidad nga 220 ka pesos lakip na ang 150 ka pesos nga bayad sa issuance sa police clearance. (Jun Prex Salubre, Ronda 6 RPN DXKS)