Gikumpirma ni Mr. Jonathan “Toto” Duhaylungsod, ang provincial agriculturist sa probinsya sa Sarangani ilalum sa buhatan ni Governor Steve Chiongbian Solon, nga ginahan-ay na nila sa ilang opisina sa OPAG kon Office of the Provincial Agriculture ang ayudang pinansyal alang sa mga kwalipikadong mag-uuma sa probinsya sa Sarangani, hilabi na ang labing na-apektuhan sa mga lockdown gumikan sa Coronavirus pandemic.
Sa pakig-alayon matud pa sa regional office sa Department of Agriculture, sunod mga adlaw lauman nga matagaan na og Singko Mil ka pesos (P5K) ang matag farmer beneficiary kadtong wala maapil sa Social Amelioration Program sa DSWD. Programa matud pa kini sa pamunuan nila Pangulong Rodrigo Duterte ug Agriculture Secretary William Dar gitawag nga Rice Farmers Financial Assistance.
Hapit kwatro mil (4K) kabuok pangalan sa mga mag-uuma ang gi-submitar sa OPAG Sarangani ngadto sa Department of Agriculture Region 12, basi sa listahan nga gihatag sa mga municipal agriculturist. Sila kadtong naka-rehistro sa Registry System for Basic Sectors in Agriculture o RSBSA.
Dili tanan ang nag-kwalipikado nga makadawat subay sa na-aprobahan sa Department of Agriculture National Office didto sa Maynila apan gapaningkamot matud pa sila Sir Duhaylungsod nga madugangan pa ang farmer beneficiaries nga mga taga-Sarangani.
Malipayon ug advance pud gibalita ni Provincial Agriculturist Duhaylungsod nga ila na lang gipaabot ang guidelines sa PCA kon Philippine Coconut Authority aron masugdan na ang pagpanghatag og ayudang pinansyal alang sa mga coconut farmer nga nananum og mga intercrop tunga-tunga sa mga punuan sa lubi, sama sa saging, gulayon ug uban pang matanum.
Nagka-isturya matud pa si Governor Solon ug ang suod nga higala sa Gobernador ang kanhing labaw sa Armed Forces of the Philippines nga si Retired Military General Benjamin Madrigal Jr. nga karon usa na ka myembro sa governing board sa PCA, alang sa maong kaayuhan sa mga coconut farmer sa Sarangani Province.
Tayming matud pa ang panahon tungod nagsugod na nga nakasinati og mga pag-ulan ang area sa Sarangani, pabor sa amelioration program sa Philippine Coconut Authority alang sa mga coco farmer nga nagapahigayon og intercropping. Kung ma-plastar pohon, Singko Mil ka pesos (P5K) napud ang maangkon sa matag benipisyaryo.
Sa pagnindot karon sa panahon nga aduna nay mga pag-ulan, lauman ang pagpadayon sa Sarangani Provincial Agriculture Office sa direktiba ni Governor Solon, sa pang-apud apod og mga semilya sa humay, mais ug mga lagutmon, sa pagsuporta kana nila Vice Governor Elmer De Peralta, mga board member, mga mayores ug nila Senador Manny ug Congressman Ruel Pacquiao. Padayon usab sila ug ang Department of Agriculture sa pagpanghatag og mga post-harvest facilities.
Malipayon na lamang nga gipabalo ni Duhaylungsod nga aduna pay suplay sa humay ug mais ang Sarangani Province human nga may ani ang mga gipangtanum sa mga mag-uuma niaging last quarter sa nakalabay nga tuig 2019. Gihimo pud nga reserba sa OPAG Sarangani ang pradaksyon sa puting mais ingkaso mudugay pa sa pipila ka bulan ang outbreak sa Coronavirus, sa dakong pag-abag usab sa NFA kon National Food Authority.
Photos: Files of PGO-PIO Sarangan
