Davao City – Duha na lang karon ang Communist Party of the Philippines – New Peoples Army (CPP-NPA) Guerilla Fronts sa Comval Province gikan sa kanhi 7-8 ka mga Guerilla Fronts sa nakalabayng mga katuigan, ug giklaro ni 10th ID Spokesperson Capt. Jerry Lamusao nga upat na lang ka mga Guerilla Fronts gikan sa kanhi 11 ka mga CPP-NPA Guerilla Fronts nga aktibong nag-operate sa tibuok Davao Region sa nakalabayng mga katuigan.
Suamal pa ni Capt. Lamusao ang padayong paghinay sa CPP-NPA Guerilla Fronts sa tibuok Davao Regiyon ug timaan niini ang kapin kon kulang 6,000 ka mga Former Rebels nga nag re-affirm sa ilang Oath of Allegiance sa gobyerno bag-o lang.
Dakong kalipay sad sa military matud pa niya ang nahitabong rekonsilyasyon sa liboang mga trabahante sa SUMIFRU ug sa mga trabahante sa kompanya nga kanhi sakop sa Kilusang Mayo Uno (KMU) nga karon misurrender na sa Gobyerno ug nanaad sa hingpit nga pagbiya sa KMU kay gusto na nilang magpuyo ug manginabuhing malinawon kauban ang ilang tagsa-tagsa ka pamilya.
Dakog nabuhat sa padayong paghinay sa kalihokan sa mga rebeldeng NPA matud pa niya ang paghatag sa gobyerno og dakong kaayohan sa mga Former Rebels ilalom sa Balik-Loob Program ni Pang. Rodrigo Duterte labi na nga gipadak-an ang mga kaayohan nga ilang madawat ilalom sa E-CLIP ug gani sa Comval aduna na say laing 24 ka mga FRs nga pagahatagan sa ilang P65,000.00 Livelihood Assistance ug Immediate Assistance.
Niadtong Septyembre 27, 2018 adunay 64 ka mga FRs nga gihatagan sa gobyerno sa ilang P65,000.00 nga Immediate Assistance ug Livelihood Assistance diha sa kapitolyo atol sa usa ka adlawng “Turn-Over of E-CLIP Assistance to Compostela Valley Beneficiaries” diin nakauban nila ni Gov. Jayvee Tyron Uy ug Vice Gov. Manuel “Way Kurat” Zamora sa pagtunol sa ilang tagsa-tagsa ka tseke si DND USec. Reynaldo B Mapagu ug mga kauban nga sila EastMinCom Commander Lt. General Benjamin R Madrigal, 10th ID Commander MGen Noel S. Clement, MGen Rene Glen O Paje, ug 1001st Brigade Commander Gilbert F Saret.
