CAGAYAN DE ORO CITY- Gibutyag sa Northern Mindanao Medical Center nga ang 75 nila ka health workers nga adunay close contact sa Covid-19 patients sa maong tambalanan ang nag negative sa resulta sa test sa virus sa pagkutlo ning maong report. Sa matag adlaw nga press briefing sa City Hall, gisugilon ni Dr. Bernard Rocha, NMMC medical specialist nga malipayon nilang gitaho ang maong resulta nga ilang nadawat apil na usab ang lain pang negative results sa upat nila ka respiratory patients.
Nahibaloan nga adunay 22 anyos nga babaye nga taga barangay Camaman-an ang na-admit gumikan sa community acquired pneumonia; usa ka 60 anyos nga lalaki nga dili taga syudad ang naadmit gihapon tungod sa susamang kondisyon; 18 anyos nga babaye taga Gusa, namatay niadtong Mayo 5 ug usa gikan Lanao del Norte ang nakarecover na.
Gibutyag ni Dr. Rocha nga aduna silay duha ka bag-ong admission sa nakalabayng nga 24 oras. Sa pikas bahin, usa ka 61 anyos nga lalaki ang girefer sa NMMC gikan sa JR Borja Memorial Hospital tungod sa 3 ka bulan na nga ubo ug paglisod sa pagginhawa. Ila pa nga gitakdang kuhaan sa swab ang pasyente.
