Mitala sa pagkunhod ang mga nagkadaiyang kaso sa krimen sa tibuok syudad sa Dapitan sukad mapahamtang ang implementasyon sa General Quarantine Period.
Sa nakutlong status report gikan sa Dapitan City Police Station ubos sa pagdumala ni PLtCol Areston Limos nasayran nga mas mitaas ang mga kaso sa Resistance and Disobedience sukad ang implementasyon sa GCQ kaniadtong Marso 16 kutob sa Mayo 11.
Kaniadtong tibuok bulan sa Pebrero ning tuig adunay 18 ka mga natalang kaso sa Peace and Order Index samtang 24 alang sa Public Safety Index diin usa sa taas niini nga kaso mao ang theft-3, murder-2 ug kaso sa RA 9262 VAWC.
Alang sa bulan sa Marso, diin sa 34 ka mga kaso sa Peace and Order Index mao ang Resistance and Disobedience-12, rape-4, direct assault-3, theft-2, PD 449 Cockfighting Law-2, RA 7610 Illegal Gambling-2, RA 9262 VAWC-2 ug grave threat-2.
Sa bulan sa Abril diin adunay mitalang 23 ka mga kaso sagad niini mao ang Resistance and Disobedience-15, PD 449 Cockfighting Law-3, RA 9262 VAWC-2 samtang alang usab sa Mayo 1 kutob petsa 11 adunay 12 ka mga kaso diin lima niini mao ang Resistance and Disobedience.
Gani, base sa pakighinabi ngadto kang PLtCol Limos adunay kinatibuk-ang 66 ka mga katawhan ang naaresto sukad niadtong Marso 16 hangtud Mayo 11 diin pulos nakalapas sa kalagdaan diha sa mga executive order nga gipahamtang sa syudad panahon sa GCQ.