CAGAYAN DE ORO CITY- Gipahimutang na karon sa modified general community quarantine ang mga dapit nga gikonsedarang “low risk” ang kaso sa coronavirus disease human una nang gibutyag nga wagtangon na ang mga kwarantinas niini nga mga dapit diin nahiapil niini ang Northern Mindanao ug ang dakbayan sa Cagayan de Oro.
Tungod niini, nagpasalamat si Mayor Oscar Moreno sa mga bag-ong giluwatan nga pamahayag sa Department of Interior and Local Governement pinaagi ni Sec. Eduardo Año gumikan sa kabalaka nga basin magkompyansa na ang katawhan kon wala nay kwarantina.
Sa pagkakaron, status quo pa ang estado sa syudad apan gipangitaan sa mga pamaagi ang mga kalihokan sa ekonomiya apan labaw sa tanan gihatagan sa dakong importansya ang panglawas sa publiko.
Gipasabot ni Moreno nga sa modified GCQ dili pasabot nga mobalik na gyud sa normal nga mga kalihokan tungod kay dilikado pa ang kahimtang, lamang mahibalik na ang transportasyon silong sa maong estado, apil na ang pipila ka establisemento apan kinahanglan gihapon nga ipatuman ang mga health protocols.
Gidugang pa sa Mayor nga labaw nga importante niini ang kwarantina diin tumong mao ang pagpuyo sa balay.