Madawat na sa mga kwalipikadong job order (JO) ug contractual sa Kapitolyo sa Sarangani ang Kinse Mil ka pesos (₱ 15K) nga productivity incentive matag usa, gipaningkamutan mahatag una ang Christmas holiday. Segun ni Engineer Gerald Faciol, ang assistant provincial administrator, gipaninguha matud pa ni Governor Steve Chiongbian Solon kauban si Vice Governor Elmer De Peralta ug tanang board member nga matagaan og kaayuhan ang mga trabahanteng JO ug contractual tungod dako silag gitampo nga mag-maayo ang panerbisyo sa Kapitolyo sa Sarangani taliwala sa nasinatian nga pandemya.
Una nag-recess ang sesyon sa Sangguniang Panlalawigan karong tuiga, aprobado napud ang annual budget sa musunod nga tuig 2021 sa Provincial Government sa Sarangani mukabat sa kapin ₱ 1.5 Bilyon ka pesos, sa pagpangamot kana ni Board Member Joseph Calanao ug sa SP Committee on Finance.
Kini pagsiguro nga aduna dayon magamit nga pondo alang sa mga programa ug proyekto sa katawhang Sarangan sa pagtungtong sa bulan sa Enero sunod tuig 2021 ilalum sa Sulong Sarangani flagship program ni Governor Solon, sa pag-ayuda nila Senador Manny ug Congressman Ruel Pacquiao, pito (7) ka mayores ug mga barangay kapitanes.
(Provincial Information Office – Sarangani)
