Mibalik na sa pag-operate ang 18 ka Dialysis Machines sa Zamboanga del Norte Medical Center (ZNMC) kaniadtong Hulyo 21, niining tuiga, human sa tulo ka adlaw nga pagka-aberya.
Sa pagpakighinabi ni Ms. Gemma P. Baraquia, ang Dialysis Technician sa maong tambalanan nga ang hinungdan nganong nagpalya ang maong dialysis machines, tungod kay barado ang upat ka tangke sa Reverse Osmosis (RO) sulod sa lima ka tuig wala na nalimpyohan.
Ang Reverse Osmosis system maoy pinaka-importanteng butang nga mosala sa halos tanang hugaw lakip na ang bakterya ug mga virus.
Gikan sa tubig sa Dipolog City Water District, salaon kini sa upat ka tangke aron mmahimong purified water nga makatabang sa mga pasyente kinsa gipailawum sa hemodialysis ug makadawat sa luwas ug limpyo nga serbisyo pinaagi sa reverse osmosis.
Kahibaloan nga adunay 56 ka pasyente sa dialysis sa maong tambalananang ilang gidala sa Ipil, Zamboanga Sibugay atul sa pagkapalya sa reverse osmosis aron magpadayon sa ilang hemodialysis.
Si Baraquia nagpasalamat sa administrasyon ni Governor Rosalina “Nanay Nene” Jalosjos, sa hinanaling aksyon ug pag-tubag sa maong problema.
Source: PROVINCIAL INFORMATION CENTER ZANORTE Facebook page