Cebu: Mga konsimedor wala na tagbaw sa serbisyo sa MCWD

0
37

Gitataw sa bag-ong natudlo nga acting general manager sa Metropolitan Cebu Water District (MCWD), nga si Atty. Joselito Thomas Baena, nga daghang mga residenti sa mga barangay sa dakbayan sa Sugbo ang wala natagbaw sa serbisyo sa MCWD.

“Aburido ang ulo sa mga tawo karun. Magpasalamat ta sa mga kapitan nga maoy nipakalma niya,” matod ni Baena atol sa Pagtuki, Pagsusi, Pagsuta sa tulumanon sa RMN Sugboanon Channel, kagahapong adlawa Abril 24, 2024.

Dugang ni Atty. Baena, nga matod pa ang mga residenti sa 10 ka mga barangay sa dakbayan sa Sugbo niingon nga ang liderato karon sa water district pakyas sa pagsulbad sa ilang mga problema kabahin sa tubig.

(Photo courtesy of Cebu City • News & Information)

Sa pagsusi sa MCWD OIC GM sa mga barangay iyang nasayran nga 2 ngadto sa 3 na ka adlaw walay agas sa tubig ang ilang lugar.

Kagahapong adlawa gibisita ni Baena ang mga Barangay sa Sambag 1, Sambag 2, Sta. Cruz, San Antonio, Tinago, Barrio Luz, Kamputhaw, San Nicolas Proper, Suba, Duljo Fatima, ug Pasil.

“Ang Pasil naglisud og paayo sa tubig. Gitilok nalang sa mga tawo ang sulod sa firetruck (nga mosupply nila og tubig),” dugang pamahayag ni Atty. Baena.

“Naay sitio nga walay tubig, nangutana pud sila nganong dili sila makakuha sa fire hydrant. Kinahanglan sila ipasabot nganong dili pwede kay clueless sila,” pagpasabot ni Baena.

Ning subrang kainiton sa panahon karon daghan ang nagkinahanglan og tubig sa matag lugar. (Renante Socia Lada)

(Source: Cebu City • News & Information)

Leave a Reply