Maipaayan ti pammadayaw dagiti “quarry permittee” ditoy Ilocos Norte a napintas ti operasyonda ken dagiti awan ti nalabsingda a paglintegan.
Segun ken ni Provincial Administrator Atty. Yvette Leynes, agak-akem a mangidadaulo ti “provincial quarry office”, mamati ti gobierno probinsial iti panangidaulo ni Gob. Matthew Marcos Manotoc a daytoy ti kakaisuna a wagas tapno maipaayan ti pammigbig ken panagyaman dagiti amin a kontribusyon nga ipapaay dagitoy iti probinsia.
Impalgakna a malaksid kadagiti “permittee”, kalikagum pay ti probinsia a maipaayan ti pammadayaw dagiti tumultulong a mangtiliw kadagiti saan a mangipatpatungpal kadagiti pagannurutan iti panag-quarry.
Mainaig, kunana a napanunutan ti gobierno probinsial a maigiddan ti pannakaipaay ti pammigbig kadagiti maseknan bayat ti “provincial mining summit” intono Hulio 27 iti JLP Resort iti Brgy. Suba ti ili a Paoay.
Immun-una ngem iti daytoy, inpakaammo ni Leynes a maiyuswat ti nasao nga aktibidad babaen ti panangisponsor ti Department of Environment and Natural Resources Mines and Geo-sciences Bureau wenno DENR MGB Regional Office.
Imbatadna a naawis dagiti amin a “quarry permittee” ditoy probinsia pakairamanan dagiti nagngudon dagiti permitda ken dagiti baro nga aplikante a makipaset iti nasao nga aktibidad.
Innayonna a kangrunaan a “highlight” ti aktibidad ti pannakailawlawag dagiti “best practices” iti panag-quarry”.
Author: Ronald Domingo
Source: PGIN
