Un joven Zamboangueño atleta ya lleba un grande honor con el ciudad de Zamboanga na liña de deportes.
Si Gehan Ralph Ungaya, un atleta Zamboangueño, ya gana un medalla de bronze na Tanding category junior class C de 45 hasta 50 kilos el pesades na 13th Asean School Games que ta conduci na ciudad de Da Nang, Vietnam.
Si Dr. Cecil Atilano, el jefe del oficina de deportes del ciudad, ya habla el 13th Asean School Games ya comensa del May 31 y hay acaba na Domingo, Junio 9.
Asegun con Atilano, si Ungaya es un estudiante del Don Pablo Lorenzo Memorial High School Stand-Alone Senior High School.
Asegun con Atilano, el Tanding (combat) es un categoria del pencak silat, un evento de karate.
Lebando el tema de “Connect to shine together”, con el 13th Asean Games ta participa el mas de 1,300 estudiantes y entrenadores desde’l 10 nacion que miembros de Association of Southeast Asian Nation (Asean).
El mga nacion miembros de Asean ta inclui el Brunei, Cambodia, Indonesia, Laos, Malaysia, Myanmar, Pilipinas, Singapore, Thailand, y Vietnam. (B. Garcia)