Un Zamboangueña ya gana un medalya de oro y dos de plata del Biyernes na “2023 Asian Youth and Junior Weightlifting Championships” que ta conduci na New Delhi, India.
Ele amo si Alexsandra Ann Diaz, el subrinna de Hidilyn Diaz, quien ya gana medalya de plata del 2016 Summer Olympics na Brazil y medalya de oro del 2020 Summer Olympics na Japan.
Asegun con Dr. Cecile Atilano, el City Sports Development Office, cay si Alexsandra Diaz ya gana medalya de oro na “snatch” (57 kilos) y ya gana medalya del plata na “clean and jerk” (66 kilos) y con el suma total de 123 kilos na categoriya de 40 kilos Group A Division de mujeres.
Asegun con Atilano cay el Asian Youth and Junior Weightlifting Championships ya principia del Hulyo 25 has na Agosto 5.
El govierno local bajo el liderato del Alcalde John Dalipe muy orgulloso con Alexsandra Diaz por su victoria na mencionao concurso. (B. Garcia, photo courtesy of Dr. Cecile Atilano, City Sports Development officer)