Ya aresta mga pulis con un trabajante de construccion quien alegaomente uno del mga echor na abuso sexual y matansa de un jovencita estudiante aqui na ciudad del Zamboanga.
Si Police Colonel Alexander Lorenzo, el Zamboanga City Police Office (ZCPO) director, ya nombra con el arestao suspechao como si Nickson Saavedra, 29 años el edad.
Asegun con Lorenzo cay con Saavedra ya aresta mga personajes del Zamboanga City Police Station 4 (ZCPS4) mga alas 8:48 del noche del Huwebes na Zone 4, Barangay Pasobolong, este ciudad de Zamboanga.
Asegun con Lorenzo cay con Saavedra positivamente ya conose el un 15 años testigo durante el “police line-up”,
Con Saavedra ya nombra como uno del mga suspechao envuelto na matansa del un 17 años estudianta na Barangay Pasobolong.
Con el estudianta ya encontra muerto na buugan na Zone 3, Barangay Pasobolong mga ala 1:56 del tarde del Miyercoles, 24 horas despues ya desaparese el victima.
Asegun con Lorenzo cay demas temprano ya invita ya con Saavedra para aparece na ZCPS4 como un persona de interes (person of interest).
Asegun con Lorenzo cay si Saavedra detenido ahora na carcel del ZCPS4 myentras ta ase pa enbuscada con otro uno suspechao quien ta esconde desde con el mga otoridad. (B. Garcia, photo courtesy of ZCPS4)