El Coast Guard District Southwestern Mindanao (CGDSWM), por medio del Coast Guard Nursing Service Sub-Unit Southwestern Mindanao, ya conduci doce (12) dias entreno aserca de Basic Life Support (BLS) para con el doscientos cuarenta y cinco (245) personajes del unit.
Ya conduci el entreno (training), na cuartel general del CGDSWM locao na Zamboanga City Special Economic Zone Authority and Freeport na Sitio San Ramon, Barrio de Talisayan ciudad de Zamboanga.
Mientras, ya dividi con el maga participantes na seis (6) batches, que ta consisti maga personajes del CGDSWM Headquarters, Coast Guard stations, and Operational Control (OPCON) units.
Con el adiestramiento, ya encabeza canda Teniente Junior Dennis Cloyd B. Casano, Ensign Julius Edward M. Corral, y Ensign Farida A. Daud, junto con el personajes del Coast Guard Nursing Service Sub-Unit Southwestern Mindanao.
Asegun, ya tropeza maga participantes conferencias y ejercicios practico sobre el esencial tecnicas de Basic Life Support para haber aumenta diila sabidurias y preparacion na respondida na emergencia medico, incidente maritima, y otros pa situacion que na peligro el vida.
Por medio, el fortalecemiento del habilidad del maga personajes na salvada vida, el Guardia Costera de Filipinas sin descanso el reforzada na capacidad y el aseguramiento cay todo miembros ay preparao para proporciona inmediatamente y efectivo asistencia que ta necesita.
Ademas, el programa es parte del Guardia Costera de Filipinas, na implementacion del Intensified Community Assistance, Awareness, Response, and Enforcement (iCARE) campaign. (Keith Luna)