El mga autoridad ya confisca na un operacion de aplicacion de ley P1.4 millones valor de smuggled cigarillo na provincia del Zamboanga Sibugay, asegun con el policia del Sabado.
Asegun con el Philippine National Police-Maritime Group (PNP-MG), con el mga smuggled cigarillo ya confisca el mga personajes del Zamboanga Sibugay Maritime Police Station (ZS MARPSTA) y Buro de Aduana, o BOC, del Jueves na Bayo de Sibugay.
Asegun con el PNP-MG, el mga personajes del ZS MARPSTA y BOC ta conduci patrulla maritima cuando ya columbra sila un banca de motor ta transporta mga cajon de cigarillo.
“Ya precura sila atraca con el banca de motor, pero ya escapa este. Despues de cuantos minutos lagasan, el mga ocupantes ya abandona con el banca de motor na canto’y aplaya y ya escapa rapidamente,” el PNP-MG ya habla na un anuncio.
Asegun con el PNP-MG, total de P1,403,000 de marca variada cigarillo el ya confisca el mga personajes del ZS MARPSTA y BOC.
Durante el inspeccion, el mga autoridad ya nota cay nohay advertencia sanitaria grafica el mga paquetes de cigarillo que un violacion del Ley de Republica Numero 10643 y del Ley de Republica Numero 10863 o mas conocido como el Customs Modernization and Tariff Act.
Asegun con el PNP-MG, con el mga confiscao cigarillo ya pone bajo’l custodia del ZS MARPSTA para el propio disposicion. (B. Garcia)