El Zamboanga City Medical Center (ZCMC) ya registra seis victimas relatao na uso de rebentador durante el celebracion del año nuevo.
Asegun con Dr. Shadrina Tahil Sarapuddin, el portavoz del ZCMC, todo con el seis victimas ya cura na departamento de cirugia y urgencias, o Emergency Room Surgery Department.
Asegun con Sarapuddin, el mga victimas ta inclui el mga sigueintes: 25 años hombre de Barangay Arena Blanco; 23 años gente de Barangay Sinunuc; 13 años bata de Sta. Catalina; 12 años bata de Talon-Talon; seis años bata de Campo Islam; y, sinco años bata de Barangay Mampang.
Si Sarapuddin ya habla, mayoriya del mga victimas ya sufri irida na ojos y mano que ya causa el piccolo, cohetes bebes, o baby rockets, y boga.
Mientras tanto, si Sarapuddin ya hace acorda con el publico, especialmente aquellos quien ya sufri irida relatao na uso de rebentador para anda consulta na doctor.
Ese para puede determina, asegun con Sarapuddin, si tiene ba el necesidad claba canila inyeccion contra tetanos. (B. Garcia)