Un persona quien estaba na calaboso el ya muri na un incidente de tiroteo na Barangay Pasonanca, ciudad de Zamboanga, asegun con el policia del Lunes.
El Zamboanga City Police Station 7 (ZCPS7), ya identifica con el fatalidad como si Michael Naranjo, 38 años el edad.
Asegun con el ZCPS7, el incidente ya ocuri mga 7:30 del Domingo denoche na Sitio Muruk, Barangay Pasonanca, ciudad de Zamboanga.
Base na investigacion del ZCPS7, si Naranjo ta maneja su nuevo componido motorciclo de camino pa bolbida cuando ya tira conele por muchas beses el un desconocido persona aproximadamente 50 metros desde’l su casa.
Asegun con el policia, antes del incidente ya anda si Naranjo saca su nuevo componido motorciclo na un taller na Pasonanca.
Asegun con el policia, nohay ni algun testigo siendo oscuro el lugar donde ya ocuri el incidente.
El hermana del victima, si Michellen Naranjo, ya informa con el policia cay ya uwi le tres tiro, despues derepente un tal Genner Alejando, uno del de ila vicinos, ya informa conele cay tumbao si hermano na tierra.
Asegun con el policia, el victima ya sufri tres irida na de bala na pecho, uno na estomago, y uno na cabesa.
Asegun con el policia, ya lleva con el victima na hospital, sin embargo, ya declara conele muerto el doctor.
El ZCPS7 ya continua conduci investigacion para determina si cosa el motive y establici con el identificacion del suspechao del incidente. (B. Garcia)