El gobierno del ciudad de Zamboanga ya inagura y entrega con el nuevo componido edeficio para na instalaciones del Western Mindanao State University (WMSU) na ciudad de Zamboanga.
El inaguracion y entrego del nuevo componido que ya hace del Viernes ya encabesa el Alcalde John Dalipe.
El edeficio amo para usa el College of Liberal Arts Graduate Extension Program.
Asegun con Dalipe, el edeficio que ya costa P14.57 millones, es uno del mucho proyectos relatao na educacion del gobierno del ciudad y ya demostra el suporta del ciudad na sector de educacion.
Asegun con Dalipe, el nuevo componido edeficio locao na 574.56 metros cuadrado lugar y ya compone el un privado contractor por medio del supervision del Oficina de Enginieria del Ciudad.
Mientras tanto, si Dalipe ya promete ayuda con el mga universidades estatales na ciudad realiza de ila mision para acomplici exelencia.
Si Dr. Carla Ochotorena, el presidente del WMSU, ya expresa su gratitud con Dalipe, emfatizando cay el nuevo omento facilidad del WMSU ta demostra el esfuerzos colavorativo entre el universidad y gobierno local para fomenta progreso educativo y desarollo comunitaria. (B. Garcia)