Trenta’y siete mga estudaintes na municipio de Lantawan, Basilan el ya recivi esencial cosas de escuela y paquetes de nutricioso comida durante un programa de servicio para comunidad, asegun con el militar del Domingo.
Asegun con el 4th Civil Relation Group (4CRG), el beneficiarios del programa de servicio para comunidad amo el mga estudiantes del Lawila Learning Center na Barangay Lawila municipio de Lantawan.
Asegun con el 4CRG, el programa ya encabesa el 4th Special Forces Battalion (4SFBn) bajo mando de Tiniente Coronel Adolf Ian Garceron, en colaboracion con el gobierno local del Lantawan que ta encabesa el Alcalde Nasser Abubakar.
Sin embargo, el contibuyentes descatados del programa amo el miembros dinamico del movimiento joven por la paz (Youth For Peace Movement) capitulo de Lantawan, guiado Jayvee Alegre, el gobernador del capitulo o chapter.
Asegun con el 4CRG, bien notable el esfuerzo del movimiento joven por la paz cay ya inicia sila para dale el necesidades de escuela con el mga estudiantes por medio de organizar el programa de servicio para comnundad.
“El de ila aprochada hinde lang ya proporciona inmidietamente suporta con mga estudiantes, pero ya establece tambien un fuerte ejemplo de responsibilidad civico y espiritu colaborativo,” el 4CRG ya habla na un declaracion.
Ya rendi tamen especial gratitud el grupo del movimiento joven por la paz con el 101st Infantry Brigade, Fraternal Order of Eagles-Philippine Eagles y con Señora Pia Capiral del The 30-minute Trade por el de ila invaluable contribuciones.
Asegun con el 4CRG, el de ila suporta ya complementa con el esfuerzo del movimiento joven por la paz, ayudando ya hace exitoso con el programa de servicio para comunidad. (B. Garcia)