Ya dale honor si Tiniente Heneral Alfredo Rosario Hijo, comandante del Western Mindanao Command (Westmincom), con Tiniente Coronel Paul Bailey y con su companieros bajo el Special Operations Task Force 511.2 o el SOTF-511.2 por el de ila contribusion na Westmincom.
El maga soldao Americano ya recivi military civic action medal durante un simple ceremonya ayer na quartel del Westmincom adentro del Campo Navarro aki na ciudad.
Fuera con Bailey, aquellos quien ya recivi military civic action medal ta incluwi canda Major James Salka, Major Daniel Grant, Captain Michael Nerdahl, Captain Edward Robinson, and 1st Sergeant Robert Turek, todo maga myembros del fuesa marino del estados unidos.
Si Bailey y su maga companieros ya esta serca ocho adentro na Campo Navarro como maga foreign liaison elements del Westmincom.
Na mismo ocasion, ya pone tamen si Rosario na hombro de Bailey su nuevo ranggo de tiniente coronel despues que ya ase subi su ranggo el fuersa aramada del estados unidos.
Si Rosario ya expresa su gratitud con el grupo de Bailey por el saber y capabilidad ya dale sila como suporta na acomplisimiento del Westmincom.
Ya roga tamen si Rosario cay esta sila na buen salud na de ila siguiente asignacion.
Na parte tamen de Bailey, ya rindi le gracias con el Westmincom cay ya dale canila un librao lugar durante el estada de ila aqui na ciudad.
Ya asegura tamen si Bailey cay aqullos quien releva canila ay mantene con el fuete relacion entre el maga soldao Filipino y Americano.
Con el actividad ayer na Westmincom ya atende tamen el otro maga alto oficiales del Westmincom. (Bong Garcia, Jr., photo courtesy of WestMinCom)