El Western Mindanao Command (Westmincom) ya dale honor con un soldao por su honestidad.
Mudao de uniporme de militar, si Private First Class Jaypee Algabre ya marcha del Lunes para na grandstand del Westmincom para recivi con el honor de “Sagisag ng Ulirang Kawal”, un propio reconosimiento ya conferi con ele el liderato del mando por su honestiya.
Asegun con el Westmincom cay si Algabre ya encontra un portamoneda ta contene P13,000 myentras ta navega le desde el “Camp Navarro General Hospital” para na primer puerta el campo del Hulyo 19, 2023.
Con todo sinceridad, si Algabre imidietamente ya busca con el dueño del portamoneda, quien un soldao del “Special Operations Task Force 511.2” del fuersa armada del Estados Unidos base na Westmincom.
Na mismo dia del Hulyo 19, ya puede si Algabre debolbe con el portamoneda con el dueño.
Asegun con Tiñente Heneral Roy Galido, el comandante del Westmincom, si Algabre ya dale mira su buen moralidad que devia sigi el losdemas personajes del mando.
Asegun con Galido cay el honestiya de Algabre ya adqueri el admiracion hinde lang del mga Filipino soldao sino hasta del mga americano soldao tambien.
“Ya dale orgullo si Algabre con el entero fuersa aramada del Pilipinas con su obra,” asegun con Galido.
Si Algabre designao na 54th Engineer Brigade based na Barangay Cabatangan, este ciudad. (B. Garcia) (Photo Courtesy of Westmincom PIO)