El pulisiya ya aresta con tres fescador con quien ya alcansa sila ta fesca ilegalmente na municipio el Siay, Zamboanga Sibugay.
Si Police Colonel Eduard Mallo, el director del pulisiya na Zamboanga Sibugay, ya nombra con el tres arestao fescador como canda Arnel Estrada, 43; Jose Dumasig, 40; y si Marlon Isin, 41, todo mga residentes del Barangay Nazareth municipio de Kabasalan.
Asegun con Mallo cay ta man patrulya mga pulis cuando ya columbra sila con el tres fescador ta fesca de ilegal manera mga alas 5:40 del tarde del Lunes na aplaya del Sitio Kabug, Barangay Laih, Siay.
El tres fescador ya buta na agua con el del ila mga equipakes de fesca cuando ya gole sila el presencia del mga pulis.
Asegun con Mallo ya puede confisca na posesion del mga suspechao un vinta con 13 kaballo el fuersa que tiene el valor de P8,400.
Con el mga arestao fescador ya entrega na oficina del agricultura del Siay donde ya multa canila base na provisiones del Ordinansa numero 357. (B. Garcia)
