Un retirao soldao, listao como uno del mga bien “wanted persona” na rehyon de Bicol, el ya aresta mga otoridad ta esconde aqui na ciudad de Zamboanga.
El arestao retirao mymebro del Air Force amo si Abelardo Geneblazo, 67 años el edad, asegun con Police Colonel Alexander Lorenzo, el director del Zamboanga City Pollice Office.
Asegun con Lorenzo con Geneblazo ya aresta na un implementacion de orden de aresto mga alas 2:45 del tarde del Lunes na Barangay Mangusu, este ciudad.
Asegun con Lorenzo cay si Geneblazo tiene pendiente orden de aresto por el crimen de rape sin recomendao piansa que ya dale el un jusdado del ciudad de Sorsogon del Noviembre 17, 2016.
Con Geneblazo ya aresta mga pulis de Sorsogon y del ciudad de Zamboanga, incluwido mga personajes del “Special Action Force”.
Si Lorenzo ya habla cay si Geneblazo listao como el numero uno bien wanted persona na municipio de Casiguran na provincia del Sorsogon, y el numero 10 bien wanted persona na Rehyon de Bicol.
Asegun con Lorenzo cay si Geneblazo bajo ahora el custodiya del Zamboanga City Police Station 1 (ZCPS1) pendiente su entrego na concierne jusgado. (B. Garcia) (Photo Courtesy of Zamboanga City Police Office)
