El Western Mindanao Command (Westmincom) ya designa con Chief Master Sergeant Anthony Abellera como el nuevo sargento mayor de comando (command sergeant major), asegun con el Westmincom del Miercoles.
Asegun con el Westmincom, con Abellera ya instola na su puesto del otro semana durante un ceremonia de cambio de jefe de oficina que ya hace na Campo Navarro na Barangay Calarian, en este ciudad.
Si Abellera ya releva con Master Sergeant Raniel Gonzales, con quien ya designa como el nuevo deputy command sergeant major.
Si Gonzales ya servi como el interino sergeant major del Westmincom desde Agosto 18, 2023, hasta Enero 16, 2024.
Si Abellera ya expresa profunda gratitud con el liderato del Westmincom por el confiansa y confidencia que ya dale conele.
Asegun con Abellera, un grande honor para conele de servir como el sargento mayor de comando del Westmincom.
Mientras tanto si Gonzales ya expresa tamen su gratitud y apreciacion con todo personajes quien ya trabaja hunto conele durante su sinco meses turno como el interino sargento mayor.
Ya promete si Gonzales que hay suporta le con el nuevo sargento mayor de comando.
El ceremonia del cambio del jefe de oficina ya encabesa si Tiniente General William Gonzales, el comandante del Westmincom.
Na su mensaje, ya comenda si Gonzales con Master Sergeant Gonzales por su dedicao servicio y ya expresa le su confiansa con Abellera como el nuevo sargento mayor del comando. (B. Garcia, photo courtesy of Westmincom PIO)