El mga personajes del Marine Battalion Landing Team-11 (MBLT-11) ya cuji con un pulis y sinco otro personas ta transporta contrabando aqui na ciudad, asegun con el policia local.
Asegun con el policia local, con el seis quien abordo na dos vehiculo, ya cuji mga alas 2:30 del Martes aga na Barangay Cabatangan, en este ciudad.
El policia local ya nombra con el pulis con quien ya cuji mga personajes del MBLT-11 ta transporta contrabando como si Police Staff Sergeant Nazhier Alfaro del Zamboanga City Police Station 11.
Asegun con el policia local, con Alfaro ya cuji ta maneja un vehiculo que ta transporta 15 cajon de cigarillo sin propio documentos.
Ya nombra el policia local con el otro sinco personas que ya cuji mga personajes del MBLT-11 como si Ismael Sahid, 45, chufer del otro vehiculo y su mga pasajeros como canda Sitti Mahadali Djalia, 43; Jasmin Delma Aranan, 25; Queeny Salih, 36; y si Isah Ismael Consolacion, 33.
Asegun con el policia, el vehiculo que ta maneja si Sahid ta transporta sinco cajon de cigarillo sin propio documentos.
Asegun con el policia, el total de 20 cajon de cigarillo que ta transporta sila tiene el valor de P720,000.
Base na investigacion, ta conduci checkpoint operation el mga personajes del MBLT-11 cuando ya puede sila cuji con el dos vehiculo que ta maneja si Alfaro y Sahid ta transporta mga cajon de cigarillo sin propio documentos.
El mga personajes del MBLT-11 ya entrega con Alfaro y su pusil y con el otro sinco personas que ya cuji sila para na custodia del Zamboanga City Police Station 7.
Asegun con el policia local, con Alfaro y otro sinco personas ya entraga ya na custodia del Buro de Aduana para el propio disposicion. (B. Garcia)