El Western Mindanao Command (Westmincom) ta transiciona ya desde el tradicional comunicacion y archivo de datos para el corre, facil y segurao sistema que ta llama como el sistema de archivo de datos electronico.
Asegun con Tiniente General William Gonzales, el comandante del Westmincom, el mando hay adopta el concepto de un base de datos electronico para el preparada, enrutamiento, y conserva el requesito documentacion de cada dia.
Como parte del proceso de transicion, el Westmincom ya conduci cuatro-dia seminar de Joint Database Management System desde Martes hasta Viernes na quartel del mando na Campo Navarro, ciudad de Zamboanga.
Asegun con Gonzales, el actividad ya introduci el sincronizado diseño de administracion del base de datos para el operacion conjunta del mga componente unidades del Westmincom.
El administracion del base de datos es parte del ta continua programa de proceso interno de Commander’s Operations Monitoring Planning-Assistant Situational-Awareness System (Compass), incluido el sistema de administracion de personajes del Office of the Assistant Chief of Unified Command Staff for Personnel, que na fase de examinada y evaluacion.
Asegun con Gonzales, con el cuatro-dia seminar ya participa el mga alistao personajes del joint task forces y componente unidades de naval y aire del Westmincom. (B. Garcia)