Cuatro tripulantes el ya aresta y valor de P10.2 millon contrabando el ya confisca el mga autoridad na mar de Sulu, asegun con el Naval Forces Western Mindanao (NFWM) del Domingo.
El NFWM nohay mas nombra con el cuatro arestao tripulantes puera de habla’r ya pone canila bajo el consultacion medical na Camp Navarro General Hospital y na buen salud sila todo.
Asegun con el NFWM, con el cuatro tripulantes ya aresta y P10.2 millon contrabando ya confisca del Viernes na vicinidad de dos millias noreste del Barangay Mauboh, Patikul, Sulu.
Asegun con el NFWM, el mga personajes del Naval Task Force 61 (NTF-61) ta conduci patrulla maritima cuando ya columbra sila con un berde jungkung ta navega na mar con cuatro tripulantes.
El NFWM ya habla, ya inspecciona el mga personajes del NTF-61 y ya descubri sila cay el jungkung lleno de cajon de cigarillo sin el propio documentos que tiene el valor de P10,256,700.
Enseguidas ya aresta con el cuatro tripulantes y ya confisca con el mga cajon de cigarillo despues que ya falla sila presenta documentos del de ila cargamento, asegun con el NFWM.
El NFWM ya habla, con el jungkung lleno de cajon de cigarillo hasta el cuatro tripulates ya lleva na pantalan de Majini na Estacion Naval Romulo Espaldon na Barangay Calarian, ciudad de Zamboanga.
Eventualmente, con el mga contrabando, tipulantes, y jungkung hay entrega na Buro de Aduana para el propio disposicion. (B. Garcia)